AYMAR ARUNAKA (Categorías formales del aymara)

 SUTI

(Sustantivo o nombre)

Wakt’ayiri: Jorge Luis Coaquira Condori

Aymar arunx kunayman arunakw utji: sutinaka,  sutilantinaka, luririnaka, mayjt’ayirinaka, mayjachirinaka, sutir qhanañchiri, waykatirinaka, waythapirinaka, p’arxtayirinaka. Jichhax mayat mayat qhanañcht’añäni.

1. SUTI (Sustantivo o nombre)

Sutinakax piqin utjir amuyunakar ukjamarak uñjkay yänakar sutinchañatakiwa. Sutinakax jaqinakaru, uywanakaru, yänakaru, amuyunakar qhanstayañatak wali wakiskiriwa. Suti arunakax sapanakapakix qhana amuyuniwa, ukatx sapanakapakix arst’asikispawa. Sumpach amuyañatakix akjam t’aqanakaruw wakiraki:

Amuyurjamax sutinakax jaqinakaru, uywanakaru, yänakar qhanañcht’añatakiwa. Aka amuytuqix sutinakax janiw kunjam arunakax wakt’atas (saphini, jan saphinicha) ukanakax wakiskirïkiti, jan ukax kunjam amuyunis sapa aruxa, taqi ukanakaw wakiskiri. Jichhax aknïr amuyunakaw utjaraki:

§  Uñkay llamt’kay yänaka.Uñ.: qunuña, punku, uta

§  Askinaka. Uñ.: jiwaki, k’achitu, qhana, phiri, qhuru

§  Luratanaka. Uñ.: unuqïwi, muyüwi, t’ijüwi

§  Luräwinaka. Uñ.: amuyu, lup’ïwi, iyawsäwi

§  Chuyma. Uñ.: kusisiña, munasiña, khuyapayasiña

§  Pacha. Uñ.: chiküru, jayp’thapi, willjta

§  Tumpa. Uñ.: masi, munata, unisiri

§  Jakhu. Uñ.: pataka, chillqta, marqa

Sutinakax akjamat wakt’atapxarakiwa:

Aymar arunx sutinakax qhanañchirnakampiw chikachasi, akjam chikachasïwinakax juk’akiw utjaraki, ukampirus jasak amuyañatakixa, sutinakax suti qhanañchir qipháxarupuniw arktapxi. Akjamata:

                        mä tawaqu                  mä sujsthap

                        khä qullunaka             uka panqara

                        khä ch’aphi                 mä kürmi

Maysatxa, sutinakax walja, juk’a, ch’usa… suti mayt’ayir arunakampiw chikachasipxaraki. Uñ.:

                        walja jaqi                    ch’usa wakulla

                        juk’a uma                   phuqha uta

                        allux wallpa                juk’a ch’alla

                        ukataq qalastï             walja warmi

Sutinakax yaqhippachanakax mayt’ayirinakjam sutinakjam tukupxi. Uñ.:

Sutjama:                   Khä waynax jupan yuqapawa

                                   Mä ch’uxñaw juti

                                   Awki

yuqalla

Mayjachirjama:        Jupax ina waynakiw isthaptasinitäna

                                   Jupax ch’uxña isimpiw uchasini

                                   añcha awki

                                   sinti yuqalla

1.1. KUNAYMAN SUTINAKA (Clases de sustantivos)

Aymar arunx llamt’kaya, jan llamt’kaya, kipkipa, jan kikipa, ch’ullanaka, tamachatanaka, juk’amp sutinakaw utji. Sumpach yatiñatakix sapaqat mayit amuykipt’añäni.

1.1.1. Llamt’kay sutinaka (Sustantivos concretos)

Akakast sutinakax amparanakamp llamt’kaya, nayranakamp uñjkaya, nasamp mukt’kaya, jiñchup ist’kaya, laxrampis mallt’kay yänakar uñañchayirinakawa. Uñ.:

yuqalla ‘muchacho’                nina ‘fuego’                isinaka  ‘ropas’

uta  ‘casa’                               kayu ‘pie’                    pinkillu  ‘flauta’         

1.1.2. Jan llamt’kay sutinaka (Sustantivos abstractos)

Aka sutinakax jan uñjkaya, jan llamt’kaya, jan mallt’kaya, jan ist’kaya, jan mukt’kay yänakaruw qhanañchi. Uñ.:

                        iyawsäwi  ‘fe’                         uñisisiña  ‘odio’

                        cryinsa  ‘creencia’                  jucha  ‘pecado’

1.1.3. Mayni sapankir sutinaka (Sustantivos propios)

Akakast arunakax mayni sapankir sutinakawa, janiw yaqha jaqix ni yäs kipka sutinipunix utjkaspati, qhanpach arunx jaqinakax mä chimpukaspas ukjamawa. Uka sutinakax jaqi sutinakaspa, jach’a taqins uñt’at qullu sutinakaspa, jach’a markanakan sutinakapaspa, ukatx uk’ampinakampispawa.  Aka yatxat’awinx janiw ukjam sutinakax jikxatatakiti. Ukampis  qhanañcht’añatakix yaqhanakax akjamaw utjaspa:

            Siskuchu (Francisco)                          Titi qarqa (Titicaca)

            Quta qhawaña (Copacabana)             Antuku (Antonio)

            Qala qutu (Calacoto)                         Qullasuyu (Sud América)

1.1.4. Thiyapat sutinaka (Sustantivos comunes)

Aka sutinakax thiyapat jilt’ir yänakaruw qhanstayi, ukatx uka sutinakatakix taqi jaqinakas yänakas khuskhakiwa. Jichhax uñacht’anak uñjarakiñäni:

            chacha  ‘hombre’                   ch’uñu  ‘chuño’          ch’uspa  ‘bolsón’

            tawaqu  ‘mujer jóven’ padrinu  ‘padrino’      yapu  ‘sembradío’

1.1.5. Sapa sutinaka (Sustantivos individuales)

Akjam sutinakax sapa utjir yänakaruw qhañañchi. Qhanpach arunxa, sapasap yänakar sutichañatakiwa. Akjam sutinakaw jakxatataraki:

            nina  ‘fuego’               jitaranaka  ‘guitarras’            

            qhuna ‘molino’           lamana  ‘bañador’                                        

1.1.6. Qutu sutinaka (Sustantivos colectivos)

Aknïr sutinakax walja, qutu yänakaruw qhanstayapxi.

            kuka  ‘coca’                juyra ‘producto’        

uywa  ‘rebaño’            chhaxwa ‘graba’                    

1.1.7. Jakt’kay sutinaka (Sustantivos contables)

Akjam sutianakax jakt’kay yänakar qhanañchiriwa, juk’ampis akakast yänakax uñjkay llamt’kay yänakarakiwa.

            uwija  ‘oveja’              ch’uspa  ‘bolsón’                    yapu  ‘sembradío’

            yuqa  ‘hijo’                 pinkillu  ‘faluta’                      q’ara wawanaka  ‘niños pelados’

1.1.8. Jan jakt’kay sutinaka (Sustantivos incontables)

Akakast sutinakax jan jakt’kay yánakaru, achunakaru, alaxpachan utjir qhananakar qhanstayiriwa. Yatxatäwisanx janiw akakast arunak jikxatawayktanti. Ukanpis qhanañcht’añatakix akjam arunakaw utjarakispa.

            jupha  ‘quinua’                       qañawa                      

            ñik’uta ‘cabello’                      jayu  ‘sal’